Կարեն Դեմիրճյանի անվան Երևանի մետրոպոլիտենի գլխավոր տնօրենի ժ/պ Բաբկեն Սեդրակյանն ու մետրոպոլիտենի Արհմիության նախագահ Լիլիթ Կարապետյանն այսօր՝ Հայոց բանակի կազմավորման 32-րդ տարեդարձի առթիվ հյուրընկալել էին Երևանի մետրոպոլիտենի այն աշխատակիցներին, որոնց որդիներն այսօր ծառայում են հայկական բանակում։
Միջոցառման ընթացքում Արհմիության նախագահ Լիլիթ Կարապետյանը ծնողներին է հանձնել դրամական պարգևներ։
Շնորհավորելով ներկաներին հայկական բանակի օրվա կապակցությամբ՝ Բաբկեն Սեդրակյանը շնորհակալություն է հայտնել ծնողներին՝ հերոս տղաներ դաստիարակելու համար և ընդգծել, որ մեր երկրի և ժողովրդի համար բանակն ավելին է, քան պարզապես պետական կառույց․ բանակը մեր հպարտություն է ու հասարակության հայելին և յուրաքանչյուր ոք իր հետ տանում է բանակ այն, ինչ տեսել և սովորել է ընտանիքում:
Գլխավոր տնօրենը հավելել է նաև, որ զինվորական ծառայության ավարտից հետո աշխատակիցների որդիներն անխոչընդոտ կարող են ընդունվել և աշխատել Երևանի մետրոպոլիտենում։
Մեկ անգամ ևս շնորհավորելով Բանակի օրվա առթիվ` մետրոպոլիտենի գլխավոր տնօրենի ժ/պ Բաբկեն Սեդրակյանը մաղթել է ոգու ամրություն, ուժ ու կորով՝ հանուն Հայաստանի Հանրապետության խաղաղության և հզորացման:
